< الرئيسية > < التسجيل > < الشروط > < البحث > < الاتصال بنا >  

جلب قرض رخيصة لعرض الخطوة البا...  آخر رد: sayed12    <::>    8203;بلغت 147 مليون ريال «تكاف...  آخر رد: سطام الملحم    <::>    رفع مخصصات نظافة المدارس 100 %  آخر رد: سطام الملحم    <::>    التربية في بيان صحفي :لم يصدر ...  آخر رد: سطام الملحم    <::>    عطر الخلق ..يفوح من ازهارهـ،،  آخر رد: فاطمة الزهراء    <::>    قصيدة في المستشار محمد العلي  آخر رد: فاطمة الزهراء    <::>    الثبيتي يفتتح دورة النشاط التأ...  آخر رد: سطام الملحم    <::>    الابتدائية الثامنة عشر تكرم طا...  آخر رد: سطام الملحم    <::>    توصية eur/usd تحت الضغط 20/10/...  آخر رد: alayoua    <::>    عايد سليمان الرشيد يحتفل بزف...  آخر رد: ابو ريما س    <::>   
 
منتدى القريات
العودة   منتدى القريات > ملتقى القريات الأدبي > قسم الشعر العام > قسم الشعر الشعبي
 

قسم الشعر الشعبي كل مايخص الشعر الشعبي

الإهداءات

إضافة رد
 
أدوات الموضوع انواع عرض الموضوع
قديم 15-10-2007, 12:26   رقم المشاركة : 1
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي اشعار الامير خالد الفيصل

السلام عليكم ورحمة الله وبركاته

اسمحو لي ان اضع بين ايديكم مجموعه رائعه من درر وقصائد سمو الامير خالد الفيصل

نقره لعرض الصورة في صفحة مستقلة
إرفعي سهم المنايا

..إرفعي سهم المنايا يالعيون
مابقى فيني مكانٍ للطعون
.. كل شبرٍفي حياتي إنجرح
و الذي شقّوا خفوقي يشتكون
.. يا العيون الطاغيه خفّي علي
كبرت اللّي باوّل ايامي تهون
.. في عيوني دمعتين واقفه
ردّت الايام دمعي بالجفون
.. بالغَت فيني تباريح الهوَى
و أستبدّت بي مواجيع الظنون
.. خبّريني يا غرام العاشقين
كيف يستهوي هل العشق المُنُون
.. إرحمي قلبٍ تجاريبه قست
في زمانٍ ماعرف يومٍ حنون
.. اللسان يخون و البسمه كُذُوب
و اصدق التعبير نظرات العيون

نقره لعرض الصورة في صفحة مستقلة


الأمير خالد الفيصل والأمير محمد السديري(رحمه الله)


ياقلبي اللي من هوى البيض مـعـتـــاذ
واليوم اشوف الوجد والـشـوق بذه
حسبي على اللي للـمـواصـيــــل جذاذ
حـبـل الـوصـل مـن بـيـننا البعد جذه
يــسـقـي مـنـازل لــيــّـن الـعــود رذاذ
يـلـقـى بـهـا ظـبـي الـطـعـامـيس لذه
الصاحب اللي عن هوى القلب ما لاذ
لا قـــلـت دوك الـقـلـب يـازيــن غـذه
ولا نـيـب مـن هـرجه كـثـيـر وهـــذاذ
مـا شـاف فـي لـيـلـه نـهـاره يــهــذه
عساك تـأتي لي يـابـو زيـد نـــفـــــاذ
قـلـب ٍ تـحذّى الـشــور يـاخـوك حـذه

أسهر طوال الليل واغضي على الحاذ
وعـن الـصـديـق القــلب ما فيه شذه
شـكتواك خـلـت بـسـرة الـقـلـب تـخاذ
ولا عـاد فـي قــلـبـي مـن الصبر فذه
اللي يـا بـو بـنـدر جعـل قـلـبـك افــلاذ
مـشـربــك يـا مـمـدوح الأفــعال عذه
طـفـل ٍ سـهـم عـيـنـه بـالاعـماق نفاذ
والـحـق عــلـيـك بـقـذة ٍ عـقـــب قذه
ان كـان مـالك فـيـه مـدخـل ومـنـفــاذ
لـه الـشـبـك فـي مـدهـل الـصـيد بذه
وإليا دخل وسـط الـشـبك يابن الافذاذ
غـوجـك لـسـاعــات الــمــهمات حذه

نقره لعرض الصورة في صفحة مستقلة

نفسي عيوف

نفسي عيوف يا اريش العين تجزع
ما تقبل الحقران لو من عشيري
إلى متى في طلبتك باتخضع
وأسأل متى يوم الوصل بي يصيري
لو كان قلبي في هواك يتقطع
خلـه لعلـه بالقسى يستخيري
أنا جزمت أنساك يا زين وانزع
اللي بقى من حبكم في ضميري
مثلي عزيز النفس عنك يترفع
دور هبيل فواد مثلك غريرِ
نقره لعرض الصورة في صفحة مستقلة


يبكي الصوت

يبكي الصوت و النظرات تشكي
و المعاني ولو صاحت حبيسه

يصمت الليل و التنهيد يحكي
و المعاليق في قلبي يبيسه

يا حبيبه سألت الليل انا عنك
و كل نجم فقد مثلي أنيسه

هل دمعي و قام الليل يبكي
و القمر نشّ من فرقى جليسه

ويل من شالته موجة بحرك
ليتني ما نزلت الشط أقيسه

لو لمستي البحير بأطراف يدك
من حلالك غدا طعمه مريسه

للهوى حس اذا لامس زهرك
ينعش القلب اذا جاني حسيسه

نقره لعرض الصورة في صفحة مستقلة

أنـــا تـسّـلـــى

أنا تسّلى بالشعر لي توصّفت
وإلاّ فلا بالقول مهنة حياتي

ما قد سرقت البيت وألاّ تسلّفت
ما أقلّد الشّعار شعري مرآتي

أنظم ثلاث عقود واليوم ولّفت
مع أول الرّابع ثلاث خزراتي

ما أناظر اللي راح.. ما يوم وقّفت
عيني لباكر وش معه لي ابياتي

ولاني بقايل(ن) ليتني ما تصرّفت
الحمد للـه حافظ(ن) كل ذاتي

وش عادلوني في حياتي تكلّفت
يلعن ابو قلب(ن) ترّيح وماتي

كنّي مع نجوم اللّيالي توظّفت
أساهر النّجمات حل المباتي

وأسبابه اللّي من عيونه تعرّفت
إني قتيلـه يوم شال الغطاتي

أنا أشهد إنّي في غرامه تطرّفت
وصلت حد الموت قصدي مناتى

من أول(ن) في حب خلّى تلطّفت
واليوم أقول ألطف بحالي غناتى
نقره لعرض الصورة في صفحة مستقلة

حوّل سحابي

حوّل سحابي واحسب أنّي وصلْتَه وهبْت هبايبها وشالت سحابي

حلمٍ علَى غفوة زماني حلمْتَه ليت الزّمان الّلي غفا ما صحى بي

في غمضةٍ من ليل.... عمري سرقْتَه لاشك حظّي من عذابي وشَى بي

الّليل يوم أنّه صَحى بي... جرحْتَه والعمْر في مجروح ليلي سرَى بي

من وقتيَ المجروح لجروح وقْتَه يمشي وحظّي بالعَثاير مشَى بي

لوْ أنّ قيدي في يديني كسرتَه ميرْ البلى قيد الغرام ألتوَى بي

اللـه من صوتٍ علَى الشّوق جبتَه واللـه من كلمة غلى في كتابي

أطوّح المسحوب معْ كل نْهتَه واسمع علَى همس الّليالي جوابي

يا معشر العشّاق قلبي عصرْتَه قطرات خفّاقٍ من الوجد ذابِ

علَى عشيرٍ بالوفا قد وعدْتَه لو شبت ( أحبّه )... مثل فتنةْ شبابي

نقره لعرض الصورة في صفحة مستقلة

غــريـب و مـسـافـر ( من روائع امير القلوب ) خالد الفيصل

غريب و مسافر لحالـي
ودروب الايـام تعـابـه
ادور المنـزل العـالـي
ازايم الحمل وارقـى بـه
ما حب انا المركز التالي
الاول امـوت واحيـابـه
وش لو عاد الثمن غالي
روحي على العز وثابـه
ما همني جمع الاموالـي
زهاد بالمـال واصحابـه
من فيصل اعيش با مثالي
ادرس وادرس من كتابه
نقره لعرض الصورة في صفحة مستقلة

تعــــال إسهر
تعال أسهر معك يا اسمر عشيّه
تعال أسلي خاطرك يا عيوني
تهن وخل عيني بك هنيّه
أنا وياك والدنيا تهون
ترى الدنيا لياليها شقيّه
حذاري تستبد بك الظنون
نويت وكل قلب فيه نيه
على اني لك وفي روحي تمون
هواك بخاطري سوا سويه
تركني بين أياديك معنون

نقره لعرض الصورة في صفحة مستقلة

نادميــني
نادميني كلها ساعه و اغيب
مابقى غير الموادع يا حبيب
سلّي الخفاق عن همّ الزمان
و اجلَي مْن العين نزّات السّريب
طالت ايامي و انا فوق الشدّاد
الذلول تسير و الراكب غريب
درهمت بي في عجاج القايله
و الثرى من حدرها جاله لهيب
كل خفٍ يرسم بدربي حذر
لاهل ركبٍ ما بعد طبّ الشعيب
يفهّم اللي يفهم و يجهل كثير
و المراجل دربها دايم صعيب
يا كبر غلطات جهّال الحياة
ضعيوا بعيدهم واخطوا القريب
يا بعد فرق الّليال من النهار
و يا بعد فرق الغرير من اللّبيب
بعضهم يزمّ به كثر الهدوم
وان تحدّث طاح من عين الرقيب
كل رجلٍ يستره قل الكلام
و اللسان يجمّله و الاّ يعيب
نادميني..وقتي الباقي قصير
و الْمِسي بعيونك جروحي تطيب
فرّغي قلبي و فكري من عناي
يا شعاع بالعمر قبل المغيب
و مضةٍ في ليل دهرٍ ظلوم
تبعث الآمال في وقت عجيب
السؤال يغيب من قبل الجواب
نادميني..كلها ساعه و اغيب

نقره لعرض الصورة في صفحة مستقلة

يتبع000






رد مع اقتباس
قديم 15-10-2007, 12:39   رقم المشاركة : 2
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي


نقره لعرض الصورة في صفحة مستقلة


يا طارد

ياطارد الّلي راح خلّه وملواه
مايستقيم الظّل لى اعوج عوده
ولاينفع الندمان قولة حلولاه
جحر لدغ يمناك لا لا تعوده
مدّ النظر في خلق ربي تمناه
الى انتقص من حال يزوده
الله جعل للمبتلي داه ودواه
وكل على عزمات قلبه حدوده

نقره لعرض الصورة في صفحة مستقلة


الكويت.....
من رياض المجد لامجاد الكويت من ثبات العلم للعلم الثبـــات
جيت أصافح بالتّهاني كل بيـــت للشّهيد الخلد والحي الحيــــاه
فوق غيمة شوق من أبها مشيت من نداها فزّت الصّحرا نـــبات
سيّرتني نشوة الحب وسريـــــت للكويت الّلي هويت أكتب غناة
في غناتي للشّرف صوت وصيت ومن غناتي يرفع الفارس حداة
وللكرامة عرضة في كل بيـــــت والسجايا بالشهامه نايـــــــــــــفات
ياالكويت الّلي على الباغي عصيت=يوم بعض الرّبع ينسى المكرمات
يوم بان الغدر قلنا له خسيت كل شيطان رجمناه بحصــــــــــــــاه
دارت الدنيا عليهم واعتليت وانهزم جيش النّفوس الخاينــــات
يالفهد عند الوعد قلت ووفيت طاغيات الرّوس عادت صاغــــرات
مااختلفت ولاذخرت ولاشكيت شامخ مثل الجبال الراســــــيات
دلّك الله يالسنافي واهتديت والنّصر من عند رب الكاينـــــــــــات
مايغط الحق رجال بخيــــت مانسينا يالكويت السابقــــــــات
يوم عز بدارنا حلو المبيــــت إستضفتونا زمان النّايبــــــــات
لين ابو تركي ظهر من فوق هيت واصطفق من نجد لجبال السّراه
يرفع القرآن والسيف الصليـــــــت واسترد الحكم من عقب الفوات
ياالصّباح وياالسعودي لى انتخيت عزوتك عنّاز راعي الطّايلات
ويالامير الّلي على العليا نشيت جابر العثرات محمود الصفــات
في بلادك كل تكريم لقيت والنشامى ماكتفوا بالواجبـــــات
بالكويت أعطاني الشعر وعطيت وبالكويت الشعر له طعم وحلاة
نقره لعرض الصورة في صفحة مستقلة


هـــــــــــــــــــــــــــــــــلّي

هلّي على خدانها ياسحابه هلّي عليها لين ينبت بها الورد

على محلّه لين يخضر جنابه وافرح بشوفه فرحة مالها حد

خل سقاني في الهوى من شرابه ماصد لي جاني والى جيت ماصد

عزاه ياقلب تزايد عذابه على الذي حبّه بقلبي تجدد

اللي رماني باربع من حرابه ثنتين من عينه وثنتين بالخد

ياعمري اللي راح لا واسفابه وين الرفيق اللي عليه ابدي السد


نقره لعرض الصورة في صفحة مستقلة

ناقد الاشعار


ناقد الاشعار لك مني سلام
و التحيه للفكر و الاحترام

فرحتي لا شفت لك رايٍ جديد
او نظرت لبعض شعري باهتمام

يا رفيق الحرف في دنيا القصيد
عشقتي ويّاك في عذب الكلام

أنظم النظره بخفقات القلوب
و انت تنثرها دموعٍ و ابتسام

القمر و الليل و امواج البحر
و الزهر و الغيم و اصوات الحمام

و الصقر و الريم و الغوج الاصيل
و الصحاري لا زمت فيها الخيام

هي هواي اللي أغني له طرب
هي من ايام الصبا عندي غرام

أكتب الانسان بألوان الحروف
في حقيقة علم و غيبة هيام

أتصيّد خاطرٍ عند السحر
او وميض الفكر في جنح الظلام

و امزج شعوري مع حسن القبيل
في قصيدٍ مثل ندّاي الغمام

ناقدي خذ حرفي و حل الرموز
و حلل المعنى بوجد المستهام

و إن لقى الهاوي خياله بالقصيد
خبّره تراني حققت المرام


نقره لعرض الصورة في صفحة مستقلة


نقره لعرض الصورة في صفحة مستقلة


نقره لعرض الصورة في صفحة مستقلة


يا ولد عوّد



يا ولد عوّد لا هاليك ما تقوّى
لوعة الفرقا سطت فيك مسطاها
لا تهقوى ما بالابعاد سلوى
المحبه ما سلم من شرب ماها
من بلي مثلك فلا يبري البلوى
كود شوفة من بالأوطان خلاها
الذي بك يا ولد بالذي تهوى
ياولد عوّد ترى شفاك بشفاها


نقره لعرض الصورة في صفحة مستقلة


لـــــــوعـــــة العـــاشـــــــق
قالوا لي العب قلت ما نيب لاعوب
إلا مزوحٍ عند صافي الجبيني

الاعبه و افرح إلى صرت مغلوب
و اشوف و جهه لى غلبني يزيني

و اطرب على ضحكه و هو حيل طروب
و انادمه في لحظة أحلى سنيني

حبيبي اللي كل ما فيه محبوب
ترخص له الدنيا و ما كان فيني

اللي يجيني كل ما غاب لاهوب
أونس حرارة لاهبه في كنيني

و كني على غيره من الناس مغصوب
و كن العمر ياقف بليا ظنيني

و اصير بين يدين الأيام مقضوب
و الليل يجلد بالسهر موق عيني

يضحك بي الشامت إذا قلت ما أتوب
و يحزن صديق العمر مما يجيني

ليته يغطي لوعة العاشق الثوب
و إلا عيوني ما تبيّن حنيني

و إن كان تعذيب المحبين مكتوب
على عذاب الحب ربي يعيني

نقره لعرض الصورة في صفحة مستقلة


يا جريح القلب
ياجريح القلب بي عنك الجروح جعل قلبي فدوة(ن) لك ياسعد
مشرط الجرّاح في قلبي يروح كل ماهوجست بك يوم الأحد
خفقة(ن) تجزع وخفقات(ن) تنوح عالجوا جرحك وجرحي بك قعد
يشهد الله لو تعوض الروح روح ياابن أبوي فداك روحي والجسد
ياجحود الضيم ماودك تبوح بالخفوق جروح ولسانك جحد
شلت حب الناس بالقلب النصوح لين صار الحب بعروقك سدد
سمّح الله درب ذا الوجه السموح زال شرّك والمقابيل السعد


يتبع000
نقره لعرض الصورة في صفحة مستقلة






رد مع اقتباس
قديم 15-10-2007, 12:45   رقم المشاركة : 3
معلومات العضو
السلطان1

إحصائية العضو







اخر مواضيعي

 

السلطان1 غير متواجد حالياً


افتراضي

تعــــال إسهر
تعال أسهر معك يا اسمر عشيّه
تعال أسلي خاطرك يا عيوني
تهن وخل عيني بك هنيّه
أنا وياك والدنيا تهون
ترى الدنيا لياليها شقيّه
حذاري تستبد بك الظنون
نويت وكل قلب فيه نيه
على اني لك وفي روحي تمون
هواك بخاطري سوا سويه
تركني بين أياديك معنون

نقره لعرض الصورة في صفحة مستقلة



لك الشكر الجزيل على اجبارنا على الاطلاع على الموسوعات الشعرية امثال صاحب السمو والامير السديري فكلاهما بحر من الشعر
والذي يحفظ شعرهما يعتبر كوكبة من الشعر
فالف شكر على الابداع والموسوعة الذهبية

اكثر ماشدري الابيات المذكورة سابقة ولايعتبر ان الباقي ولا شي بالعكس فكلها جميلة فأنا شدد خيالي الى الابيات السابقة







التوقيع

نقره لعرض الصورة في صفحة مستقلة

رد مع اقتباس
قديم 15-10-2007, 12:54   رقم المشاركة : 4
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي

نقره لعرض الصورة في صفحة مستقلة


فارس الأشعار
يا فـارس الأشعـار منـي تحيـه مع ريشتي حاولت اصوّر معانيـك

مزجتهـا بالـوان روحـي هديـه ياليتني اخذ باقي العمـر واهديـك

يا ما خذينا مـن حنانـك عطيـه وش عندنا في مثل هذا اليوم نعطيك

نقره لعرض الصورة في صفحة مستقلة


يــاعـــــــــل قـــلــب
يا عل قلب ما شكا الحب والتاع تنهار من فوقه محاني ضلوعه

يا ما نهيت القلب لا شك ما طاع ما طاع يد لـه والليالي تلوعه

أثر المولّع دمعته تجرح القاع وإلى ذكر ما فات هلّت دموعه

يفز قلبي تالي الليل مرتاع أخاف تبعد عن ربوعي ربوعه

الموت كان العرف عقب البطا ضاع والمنتحى يا سعود صعبٍ رجوعه

في غير شوف العين ما نيب طمّاع حقّه علي أمشي بدرب المطوعه

أبو عيونٍ رمشها سود ووساع في ذبحها العاشق فتون وبتوعه


يفز قلبي تالي الليل مرتاع &&& أخاف تبعد عن ربوعي ربوعه


نقره لعرض الصورة في صفحة مستقلة


اسرج حصاني
اسرج حصاني و عطني قوسي وسهمي
ما دام انا في فلاة العمر رحّالي

اصور العمر في شعري وفي رسمي
و عاداتي آسافر الايام بلحالي

اطارد الصيد في روض(ن) عقب وسمي
و اجاوب الورق في غصن الهوا العالي

و اساهر النجم ألين يذوب بي نجمي
و اعانق الشمس اذا شعاعها مالي

و اكتب على الغيمه اللي تستخيل اسمي
و ارسل غرامي مع النسمات للغالي

حبيبي اللي مثل وبل المطر يهمي
على خفوقي سحاب الود همّالي

حبّه بروحي و في نفسي و في دمي
هو بدر ليلي و هو في شمسي ظلالي

انا احمد الله غدا سيد العرب قسمي
من يوم شفته و انا طير السعد فالي

لو شمسها تجهر و لو ليلها يعمي
و لو طالت الدرب ما فكرت في حالي

اسوق رجلي و اقوي بالامل عزمي
و اكسر الشوك حتى الورد يصفى لي

نقره لعرض الصورة في صفحة مستقلة


حدر القمر
حدر القمر صوّت لخلّه وناداه ثلاث مرات وبالرابعه ون
حدر القمر ياما همس له وناجاه وعيونهم ياما بنوره تلاقن
والبارحة عدا على الذيب بعواه وقفت ظنونه بالليال يتعادن
مر(ن) حوالينه ومر(ن) تعداه ومر(ن) تضاحك له ومر(ن) تباكن
هاذي سواة اللي عن النوم قزاه طيف حبيب اللي على خاطرة عن
إن شافت عيونه جمال تمنّاه ون وصوّت لقمري لصوت الهوى حن
الجارحه تجرح وتسري وتنساه وجروح مجروح الليالي تساقن
والخافيه طعنة زمانه تمثناه والبيّنه عنها عيونه يبوحن


نقره لعرض الصورة في صفحة مستقلة


ســــــــــافــــــــــر
سافر عسى ربي يحرسك وياقاك
هذا البخت عزّاه وش في يديني
يا شين باكر يـــا حبيبي بليّاك
لا جاء وعدك اللي بوقته تجيني
لي قمت أدوج في مداهيل ما طاك
يا مـا جرى بشهار بينك وبيني
هذا وهو توّك تطري بممشــاك
وشلون لي قفيت يـا نور عيني
يا شيب عينك يا هوى البال واشقاك
كانك مثل ما أبيك يااسمر تبيني


نقره لعرض الصورة في صفحة مستقلة


طفلة خطا
لقيت الحزن في عيون طفلة خطا مرسوم
قضى دمعها والعين تبكي ظلايمها

لفظها رصيف العمر في شارع مزحوم
تزاحم عيون الناس والهم زاحمها

ترد النظر لعيون من ناظروا مهزوم
إلى شافت العينين فيها هـزايمـها

على هامش الدنيا رضت همّها المقسوم
وراحت تمرغ بالندم روح ظالمها

على هامش الدنيا وبالدايره مغروم
عزّل واعتزل روحه وخسرت غنايمها

لهم رحمة الإسلام ما باقي معصوم
عسى يقدي من غدا في عوالمها


نقره لعرض الصورة في صفحة مستقلة

نعم شاعرك
نَعَمْ شاعْرك وافخَرْ بالسّماوه وسامٍ فيه عزْ ولـه حلاوه

وانا وَلَدْك وجندي من جنودك حَدِرْ لازمْكْ في حَضْر وُبداوه

أحبّك واحترم رايكْ واطيعك وفيٍ بالرّخا ويوم القساوه

وافاخر بالملك ـ عمّي ـ واجاهر وانبّه من علَى عينه غشاوه

ملكنا غاليٍ والعهد غالي وغالي الرّوح للغالي فداوه

فهد زَيْزُومنا في كل ساحه ظَهَرْ لـه بالوغَى ضرس وْضراوه

نصادق من رضَى عنّه ملكنا ومن عاداه لـه سمّ العداوه

إذا عاداه غاوي ردْ يمّه وقدّم لـه مراسيم الرّضاوه

يجي عنده ويشكي سوْ حالـه علَى جفْوَى الملك شاف الشّقاوه

مثل مأسورْ يبكي عندْ فارس يبي عفوه وهبّات الطّراوه

مريضٍ علّته غضبةُ فهدنا وقالوا يا طبيب الوقت داوه

عَذَرْهُم شيخنا من كبر شخصه وكفّه بالعطا يقطر نداوه

يقولـه شاعرٍ يفدي عمامه ولا يبغي علَى الرّاتب علاوه

نقره لعرض الصورة في صفحة مستقلة


لا ترحلي

لا ترحلي يا أغلى ما عندي علَيْ
كوني معي شوفي و صوتي و مسمعي
الدّنيا من غيرك وهم
معزوفه ما فيها نغم
إنت الحياه
إنت الهوى
و انت الشّجن
إنت العشيره و الوطن
و انت هلي
لا ترحلي
تعالي
زفّي لي الفرح
داوي الفؤاد اللّي انجرح
غنّي الاماني
ردّي زماني
تعالي بعيونك أشوف
و اشكل ألوان الظّروف
تعالي غنّي الحب
اللّي انتشَى منّي علَى دربك حروف
لا ترحلي
يا واجد الشّوق
اللّي يسهر ناظري
يا أعذب الذّوق
اللّي يزيّن حاضري
لا تبعد الفرحه
و انا لي بك نظر
لا تاخذ البسمه
من شْفاه العمر
تراي أنا مالي بعد شوفك صبر
لا ترحلي

نقره لعرض الصورة في صفحة مستقلة


نجمة حياتي

ميّلت نجمة حياتي للمغيب
ودّعتني راعها فجر المشيب

ليلة(ن) في برد في صحراء زمان
عشتها في غربة الدنيا غريب

عشتها جاهل وعاشتني حكيم
الخطا واجد و مرات تصيب

بينت فيني تجاريب الحياه
كل سيل حط في دربه شعيب

الصخر تشقه سيوف الدهر
كيف تسلم خفقة القلب العطيب

و الرياح تشيل كثبان الرمل
كيف زهر العشب يبقى ما يغيب

أجمع حروفي وأشكل صورتي
و الغريب اجمع شتاته بالعجيب

مرة ترقص حروفي للهوى
ومرة اسمع من حرفي نحيب

هاضني صوت الضمير الى اشتكى
اختنق ماله سميع ولا مجيب

وهاضني شكوى القلوب من العقل
ضامها كنه على الدنيا رقيب

كلما صاح الضمير و ون قلب
سالت حروفي على دمعة حبيب


نقره لعرض الصورة في صفحة مستقلة


تســـــــــــاوت
تساوت عندي الدنيا تساوت
وهي يومك قريب(ن) لي تفاوت


حياتي عقب نورك مثل ليل(ن)
جميع نجومه من أدنى تهاوت


ألا يا ناصح(ن) بالطب روحي
تراها لو لقت طب(ن) تدوات


ولكن من يعوّضني بخل(ن)
معاليق الضماير به تلاوت


أنا وياه من عهد الطفوله
مثل قلبين في صدر(ن) تخاوت


يجي عقبه فرح و إلاّ حزاين
تساوت عندي الدّنيا تساوت


نقره لعرض الصورة في صفحة مستقلة


يتبع000






رد مع اقتباس
قديم 15-10-2007, 16:48   رقم المشاركة : 5
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي

أجمل العشق

المهل ساعة عسى البسمة تدوم
ظامي(ن) للحب من يومك أصوم


بلّل القاع اليبّاس الميّته
إحيها من ديم هتّان الغيوم


أقرب أضمك بجنحان الهوى
أقرب أورّيك رقصات النجوم


وخلّني ألفّك بطيف الشعاع
فوق مزن(ن) بالهوى دايم تحوم


ألمس بكفك مواجيع الهوى
واطرد من القلب وخزات الهموم


بيني وبينك من العشق اجمله
أطعمْ واشهى من طيوف الحلوم


استضافتنا الّليال العاشقة
اشعل الضيّان واصحى لا تنوم


لا تفوّت فرحة العمر القصير
الغثا متوفر(ن) في كل يوم


يا سائليني
يا سائليني ليه غابت حروفي ما باقي إلاّ نازفات الرعوفي

الحرف ينزف والمعاني شهيده سطا بها وقت الجهل بالسيوفي

تراجع العقل والعلم والكرم وتقدّمت رجل الجهل والكفوفي

كل(ن) لقى له في هوى النفس متعه ساد الذهب والجيّد الّلي يحوفي

أقولها ولي بالأيام خبره قلّبتها وقلّبتني ظروفي

نقلتها ثلاثْ سنين حجّه يوم(ن) حزين ويوم تقرع دفوفي

كل(ن) يموت وطيّب الذكر باقي خطلان الأيادي مكرمين الضيوفي

سلّم على الّلي كل ما زاد حمله شال الحمول وقدّمته الصفوفي

هذا على غيره من النّاس يفرق كريم نفس(ن) بالمراجل ينوفي

حطّه على يمناك لي صرت ضايق ماهوب عن حوض المنايا عزوفي

يعجبك بالحضره ويعجبك غايب ويعجبك إذا كثرت عليك الصدوفي


يموت الشجر واقف

يموت الشجر واقف وظل الشجر ما مات رياح الدهر تصرخ وهي تجرح جنوبه
لك الله شجر للموت ما ترخي الهامات بقت وقفتك يا رافع الراس مهيوبه
شجوني لها مع وقفتك يا شجر وقفات عيون النظر مع نظرة الفكر مصحوبه
شموخ الشجر عبره لمن يفهم الشارات والإنسان في غفله والأيام محسوبه
أرد النظر لاشك يا نظرتي هيهات أبستوعب العبره بالأشجار مكتوبه
وأنا يعتريني ضعف الإنسان و الهقوات أروم العزايم يوم و أيّام مسلوبه
أبظهر عن الدنيا مع حامل النظرات و أسافر عن العالم على غايم دروبه
و أبرسم على غيمة دروب الهوى بسمات وأبنثر كلام الحب طرب وطروبه
و أغنّي بها سامر وأقوّم بها عرضات وأبترك ثرى الدنيا لمن كان مطلوبه


بنت الكحيلة

بنت الكحيله مهــرتي وخيالتي من كل اصيل

ألقى عليها طربتي بين المعنـــــــق والشلــــــــيل

صدر وقطاة فلـــوتي العنــــق والســـــاق الطويــــــــــــل

وقع الحـــوافر نغــــــمتي وحــــداتنا رجـــــــع الصهيـــــــل

أبوي وجدي قدوتي لو ما لهــــم عنــــــــــدي مثيل

بالدين تفخر عزوتي والرمح والسيف الصقيل

ماكر حرار ديرتي ما في هل العوجا ذليل


طالت القامات

هـل خير .. وحل خير .. وعم خير ويسـر الله كل امر في عسير

وامـطرت سحـابة الـحـب العظيم والهوى في كل قــلب له غدير

وغـنـت الاطــيـار واهـتـز الشجر والزهر يفـوح مـــن عطره عبير

وكــل وادي سـال بجموع البشر حادي الاشواق داعــــيها تسير

تضحك الفرحــة على وجه البلاد وكــل قــــلب كاد من فرحه يطير

وارتفع في كل كف سـيــــف عز وطـــالــت القامات باليـــوم الكبير

ياولي الــعـــهــد شرفت الجنوب والـرجال اللــي تــسابق بالمسير

من تهايمها ومن كـــــل الســراة ومن سهــلــها جاك سيل له هدير

يــهـتــفــون بإسـمكم حــب وولا وينذرون عداك بالــسيــف الشطير

قادهم عهد لكم منهــــــم قديم يرخصـــــــون الروح لى صاح النذير

التلاحـــــــــم والثقة والانسجام بـــين شعب وقادتـــه مالــــه نظير

بين بارود البنادق والسيــــــــوف بالمحبة عانق الشـــعب الامـــيـــر

عرضة فيها الوطن لحــــن وقصيد إنتشى الـــشــــايب لها قبل الصغير

كل نـــــــــــــــاس يفرقون بميزه والســـعودي فـــرق ميـــزاتـــه كثير

الشهامة .. والشجاعة .. والكرم والوفا .. والحب .. والــديــــــن الغزير


يا روحي أحيا بك

روحي أحيا بك و حنّا غريبين ما نيب أشوفك و انت يا روح ذاتي

في داخلي و أشكي معك لوعة البين بعيد عني وانت نبضة حياتي

يا لحظتي لو الزمن بيننا سنين و يا منوتي لو ما حصل مناتي

صوتي تقطّع في فلاة المحبين و شوفي تبدّد مع سراب الفلاةِ

لا واهنيّ من هم على الما مقيمين و أنا يبَس صوت الرّجا في لهاتي

أهيم في صحرا عديمة عناوي متاهة(ن) خلو الشجر والحصاةِ

الليل يوحش و الضحى يجرح العين و الحزن يكتب من عذابي غناتي

أمنّي عيوني من الحين للحين عسى الفرج مع طلعة الصبح ياتي

ياطاغي الفتنه من الراس للقين ياليتي أستر لوعتي في عباتي


وداع يانفس
وداع يا نفس قدرها دعاها تنازعت والموت ما عنه مردود

تشبّثت بحبال زخرف(ن) حياها تبى نهار(ن) زود واليوم موعود

تسلّلت مثل الـهوا من خفاها عجزَت تقضّب في ذرى يابس العود

تبخّرت روحي من حياض ماها يتلّها نزّاع الأرواح بركود

بالـهون يا نزّاع روحي تراها باقي عذاب أيام بيض(ن) على سود



قالوا علامك

قالوا علامك قلت ما بي خلافِ ما بي بلا يا كود فرقى1648; المحبين

الحب لو يجحد عليلـه يشافِ يدري به الّلي عارف(ن) لوعة البين

شي(ن) يشافي وشيْ بالجوف خافِ عشر(ن) تبين وخافي(ن) منه تسعين



حدنـــــي وقتـــــــــــي

حدني وقتي على شي(ن) جديدِ السهر ما هوب من عادة عيوني

أَبعدوني عن هوى بالي وسِيدي وامنعوا عنّي خطوطه ياصلوني

شطّروني عنه في دار(ن) بعيدِ حسبي اللـه كانهم منه اقطعوني

صارت الفرقا لنا علم(ن) وكيدِ ليتهم راحوا وأنا عنده نسوني

عاقني عن صاحبي سور(ن) حديدِ دونه البحور حراس(ن) ودوني

الرجا بك يا بو خالد يا عضيدي=لا تخلّيني تراهم عذبوني


غلا الناس (سلطان بن عبدالعزيز)

ليت المرض ينقل عن اللي نودّه والله لاشيله عن غلا الناس سلطان
شيخ جميع الناس ذخر تعدّه إن ضاقت الأيام واشتدت أزمان
ملجا الرفيق ومن بعد كان ضدّه حتى العدو ينصاه لي ضاق به شان
محد(ن) وصل بالجود والطيب حدّه وانا اشهد إنّه أكثر الناس إنسان
كم واحد(ن) عن لحظة الياس ردّه حتى زرَع له بالأمل روض بستان
أمّا الشجاعة فاسأل اللي يندّه وعزّي لمن لاقاه سلطان غضبان
يمناه إذا همّت بحصن(ن) تهدّه ويسراه ياما عدلّت راس غلطان
وكل(ن) عطاه الله من الحمل قدّه ونصيب ابوخالد هزع كل ميزان
وتضحك لها عينه وسنه وخدّه ما كنها إلا ريشة(ن) شالها حصان
ياالله ياربي من العمر مدّه كم عين محتاج ترجله باحسان


يتبع000






رد مع اقتباس
قديم 15-10-2007, 17:06   رقم المشاركة : 6
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي

زايل الشر

هذه القصيدة تكرم وأسلها صاحب السمو الملكي الأمير سلطان بن عبد العزيز بمناسبة دخول الشاعر لمستشفى الملك فيصل التخصصي


زايل الشر سالم يا قوي العزايم يارفيق السعد يا شايل هم غيره

مايلام الفواد اللي نقل له عظايم لو تعب واشتكى مير الله أقوى يجيره

بالغلا يابو بندر مالنا فيك لايم يشهد اللي رقيب عالم بالسريره

عل قلبك سليم يسعد الناس دايم بالوفا والمحبه خالد في مسيره

يا امير الشعر ياللي بك الشعر قايم ماجرى لك من المولى عسى فيه خيره


هذا ردا على القصيده السابقة (زايل الشر) وهي بعنوان (عاش للمجد)


عاش للمجد سلطان به الجود زايم قدمته المكارم في نحور المسيره

ماينول المراجل كود خصم الخصايم مثل ابوخالد السلطان في كل ديره

طبت من كلمتك لي ياقوي الشكايم أستمد العزايم منك وارقى عسيره

ياطبيب القلوب اللي مرضها هضايم في زمان صغيراته غدت بالكبيره

وياظلال الوجيه اللي شوتها السمايم مالقت بالمظامي مزبن تستجيره

ويا دليل العقول اللي تخبط هوايم كنه الجدي في ظلماتها نستشيره

ويا ربيع الهقاوي عقب ماهي هلايم من تعلق جنابك يرتوي من غديره

حاضر بالمراجل مثل ماهي قدايم أمسك ويومك وباكرمعك له ذخيره


عوى الذيب
عوى الذيب ياساري ..عوى ذيبها حذرا يرد الظلام عواه ..لضلوعه صياحي


ترى الليل قمّاري ..وعقب القمر غدرا ومن طاوله مسراه..زهّب له .. سلاحي


أحد بالخفا .. داري ..وأحد بالخفا.. يذرا تشيل الدروب خطاه ..والصبح .. فضّاحي


طويلات .. وقصاري ..ويمنى لها يسرى يخاف القدم ماطاه..ماقام .. من طاحي


عن العين .. متواري ..توارى .. ورا غبرا يبيه النظر وأخطاه .. مالاح .. لوّاحي


على نهرنا الجاري ..نوايا تبي مجرا مصبّه ... شكى مبداه .. في بحر .. الأملاحي


شمال؟ ..الهوى عاري ..جنوب؟.. الرمل جمرا مثل وسم ينثر ماه بصخر ارض الأسياحي


اذا ماالصقر طاري .. علا بالهوى قدرا وطنه السما .. وحماه مخلاب .. وجناحي


هواجيسي .. أشعاري ..ولا للشعر .. عذرا كتبته .. لمن يقرااه .. للصاحب .. الصاحي


لو نسيت

لو نسيت العمر ما انسى دمعتك صرخة(ن) ذابت من عيونك دموع

ترتعش مرتاعة(ن) في وجنتك وانتفض قلبي لها بين الضلوع

أزعَجت صمت الليالي عبرتك بالخفا ثوره وبالظاهر خشوع

تسكب الدمعه وتظمى نظرتك مشهد النظرة وهي تظمى يروع

يا ضياع العمر ضيعة بسمتك ضاع معها خافق(ن) مثلك جزوع

ليت من يمتص جارح لحظتك والفرح يشعل دياجيرك شموع

غربة الروح


قامت تعاظم غربة الروح يا سعود يالله دخيلك و استجدّت جدايد
تغرّبت وسط الجسد روح مجحود في دارها وشلون راحت بدايد
والشوف ذاب و خالطت بيضها سود و الزّود نقص وناقص العلم زايد
من اول(ن) و الطيب للناس مقصود و اليوم صارت طيّباته شرايد
للوقت تالي مثل باديه مشهود فيه الجهل عوّد على الناس سايد
يا عازف(ن) عمري على نغمة العود هذي حياتي غنها لي قصايد
مر(ن) على الهيّن و مر(ن) على الكود وعمر الفتى لحظات هيّن و كايد
واسمع من الخفّاق رجع و مردود قلب(ن) مع الونات قد له عوايد


يا سامرين الليل

ياسامرين الليل في بحر الأشواق يا ليتني معكم يلوح شراعي
بين القمر والموج لمعه وبرّاق والنسمه العذبه للغالين داعي
القرب يالغالين للروح ترياق والبعد ذَبـّاح القلوب الوجاعي
لا واعنا اللي باطرف الليل مشتاق خلّوه ربعه مع سلام الوداعي
يسهر مع الذكرى على صفر الأوراق في صفحة(ن) تشرب دموع اليراعي
بين الرجا والياس وقّف على ساق والدرب بقلوب المواليف ساعي


سرى سرى
سرى سرى مع ساري الليل بالي الشّوق داعي والمودّه دليله
على جناح الليل ميّل ومالِ في رحلة(ن) لأهل العيون الكحيله
أنا وهو لو باعدتنا الليالي بين القلوب عناق خل وخليله
يا غالي الهاجوس هاجوس غالي شلني معك في جو ضافي الجديله
في ليلة(ن) قمرا هواها صفالي لى غاب بدر الكون خلّي بديله


غربة الاشواق
في غربتي ، عارضت أنا ركب الأغراب أشد .. وأنزل .. والليالي ركايب

أضداد .. وأقران وعدوان .. وأصحاب متناقضات الخلق .. ماغاب غايب

وقامت تجاذَبني على درب .. الأسباب نفس الشباب .. يحدها عقل شايب

أصبح على فجرٍ ضحوك(ن) .. وعجاب وأمسي على همسات ، ستر العجايب

أسهر معَ تهويم نجمات الأحباب حتى يصير النجم بالصبح ذايب

مشيت في رمضا .. وسنّدت بهضاب وعارضني سيول(ن) ، وهبّت هبايب

وأمسيت في صحرا .. و قيّلت في غاب ومن طاول الغربات ، شاف الغرايب

مرتني الدمعه ، بها الوجد ماذاب في غربة الأشواق ، راحت ذهايب

ومرتني البسمه ، تقل فوقها حجاب وراك خجلا يارسول الحبايب

والحب.. مريته غريب(ن) على باب عقب القصور .. أمست بيوته خرايب

بغيت أسلي خاطره .. عقب ماشاب لقيت ماله بالتسلي طلايب

أقفى مع المقفين .. وجل(ن) ومرتاب على عقوق الوقت ، بالحيل عايب

في غربتي .. مريت رجلي وركّاب أرزاق .. من رب الخلايق ، وهايب


محمد بن راشد ال مكتوم ودايم السيف
هذه قصيدة وجهها الشيخ محمد ال مكتوم إلى الأمير خالد الفيصل يقول فيها

صفح صافي الخد المصفي عز الصفا وصفا ما صفا من ما صفا غير الانصافي
صفاني وصافاني ولكن ماصفا وفي معي لكن ما بوفي الوافي
بغيت الوفا لكن جبلي من الوفا تقصر وريده منها المنبع الصافي
وطيت الحفا وأمشي على حافي الحفا مصاهيرها وأمشي عليها وانا حافي
لمست الجوى في خافي الروح والتوى جحيم يشب ابخافي الخافق الخافي
يا تل قلبي تل حر من العلا تنحى وشبق شارد الجول متفاني
وعزى لروح عسها عاسف الهوى عسيف يعسفها معاسيف عسافي
تواقد لظاها شبها موقد الغضا نسيما تزاغيها نسانيس هفافي
عسفها على غير الهوى عاسف النوى وكلفها على صوغ المكاليف كلافي
الا ياشفا نفس متفاه للشفا تشافي شفاها منك وأنت شفا الشافي
والا يا غزال يرتعي فايع الخلا ربيت المهالي يرتعن بر الاطرافي
دمانيه متقاف عن شمة الهوى لفحها الذعير وحاوزت صوب لكشافي
مصافيف عقد صف من لؤلؤ الصفا جواهر منقايه كما صفوة الصافي
كم قانص للصيد في قانص الخلا تعذر عليه الصيد لو كان لقافي
شكيه لكم يا دايم السيف في النيا لزيم وفي كل المعاريف عرافي
شقاي الونين وحالتي بالشقا لوى عزيز الجروح ابشقها ما رفا الرافي


وكان رد الأمير خالد


عفا الله عن قلب من الحب ما عفا تحده عيون الشيخ والقلب ميلاف
ينام الملا والشيخ سهران ما غفا ولا هو بممروض ولا هو بمتعاف
يقنب قنيب الذيب بالليل وان عوى ترد النجوم اعواه من هول ماشاف
والصبح يسرح هايم القلب لا مشا=ومن راس مشراف على مشراف
صويب الخفوق ولا لقى للخفوق دوا يقدر عليه السير قدام وخلاف
صحيح الهوى قتال في حالة الجفا فلا شك من يسلي عن الغالي الجاف
تعرض جميلة صيد في مرتع الظبا تقود الجميلة ناهية كل الأوصاف
عنود تتل القلب من سابق المها لها في خفوق الشيخ مربع ومصياف
رمته العيون من قبل ما رمى وعود خبير الصيد مصيود ياكافي
وذي عادة القناص يصبر على القصا يشيل الحمول اللي ثقيلات واخفاف
ولا بد للطلاب ياصل على المدا ولو عارضه عذال وان جاه حساف
ومن يطلب المثمون يشريه لوغلا ومن يطلب العليا يجنب عن الهافي
ولولا اختلاف الراي تساووا الملا ولا بين القاصر ولا بين اسنافي
تشاكيت يا محمد عقب كل ما جرا ولك بالخير ثوب من المعرفة ضاف
ومثلك سديد الراي يسهدي الهدى ولك عملة تصرف مع كل صراف
تكرمت يا محمد على اخوانك بالنبا وانا مع صدوق الود روحت لك قافي


ساعات العصر
ليت عقل العود في سن الشباب وحكمة الستين في عشرينها

كان ما جرَ القدم درب العذاب وانتهزت ظروفها في حينها

وكان ما ضاعت دقايقها هباب وكل لحظه أستغل سنينها

كم تركت من الفرص واقفلت باب بعتها واهل الفرص شارينها

وان نصحني ناصح أحسب حساب قلت يمدي .. توَنا بادينها

العمر باوَل زمامه لا تهاب والَليلْ طوال يا سارينها

ما هقيت إن الزمن مثل السراب والَليالي خيَبت راجينها

أثر ساعات العمر مثل السحاب بالظلام تمر ما ندري بها

ويل من همَاته صعود الهضاب ترجمه ريحانها بايدينها

وحظ من همَاته يحوش التراب يبشر بكثر الذهب في طينها

وكل قصر له أساس وسقف وباب يحكمون اركانها بانينها

والصيانة للقصر وإلا الخراب أفطنوا للدار يا حامينها


من بلاه الله
من بلاه الله تصبر واحتسب عادة المسلم على الشدة صبور
اتلمس للخوي عذر وسبب لي لحقني من بعض ربعي قصور
واتحمل زلة كحيل العرب واتحاشا عضة الكلب العقور
اعشق الغالي ولاهوب الذهب وانزل العالي و لاهيب القصور
في هجير العمر خاويت التعب فوق رمل البيد او موج البحور
كل حي في حياته له طلب ذا تهياله وهذا في دبور
لا تعجب ما على الدنيا عجب حكمة الرحمن خلاها تدور



يتبع000






رد مع اقتباس
قديم 15-10-2007, 21:00   رقم المشاركة : 7
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي

نقره لعرض الصورة في صفحة مستقلة

الأمير خالد يرثي الملك فيصل بالفصحى

قالت أبوك وأغمضت عين الأسى
فـــرأيت هولاً أعجـز الأهوالا

ولمحت في غور العيون تساؤلاً
هل أنجب الرجل العظيم رجالاً

لم أسكب الدمع الحزين وإنمـال
رمت المثال من العظيم مثالا

لا ينثني عزمي وفيصل والدي
لاعٍشت إن لم أحتذيه خٍصالا



نقره لعرض الصورة في صفحة مستقلة

عزّ القصيد

عَزّ القصيد وزاعلتني حروفه من يوم غاب الّلي قصيدي مهاويه

غابت به الدنيا وخلّت طيوفه عزّي لمن مثلي زمانه يعاديه

عقب الملاقى1648; بس بالقلب أشوفه وعقب المناجى1648; بس بالفكر أناجيه

كلامي وشوفي لغيره حسوفه من غيره يْخاوي غريبي وأخاويه

يا لوعة المشتاق تصفق كفوفه لين التفت ما شاف بالدّار غاليه

كنّ العيون بكل شين محْذوفه والقلب كنّ جموع الأيام ترميه

تسابقتني من زماني سيوفه تجرح مْرادي في حياتي وتدميه

يا عونة الرحمن وين النكوفه لين انتحى1648; الخفّاق وش عاد يثنيه

ما رحت أدوّر عند خلّي مروفه ما يرحم إلاّ اللـه فلا شك مغليه



نقره لعرض الصورة في صفحة مستقلة


يا سيدي عاش راسك




قام شاعرنا بزيارة لصاحب السمو الملكي الأمير سلطان بن عبدالعزيز
أثناء تمتع سموه بإجازته السنوية..

ولما عاد شاعرنا أرسل له الأمير سلطان هذا البيت:

اللـه على الصاحب المنحاش عن ربعه الّلي يحبّونه


فهاجت شجون دايم السيف وقال:

يا سيّدي عاش راسك عاش عسَى أكثر الناس يفدونه

شيخ(ن) لكل المراجل حاش ما يتلي الناس يتلونه

صدره بحب العرب جيّاش تضحك ثناياه وعيونه

ومخلاب صقر(ن) إلَى من ناش يفصل عن الـهامه مُتونه

يا سيّدي ما أرغب المطراش لولا لزوم(ن) تعرُفونه

أخاف من هرجة الأوباش يمشون بالكذب يرمونه

ياما تمنّيت لكن ماش أسير مع ظلّك ودونه

وما البس بدال الحرير خُياش ومن حبّه القلب ما خونه

وإن سلم راسك برَدْت الجاش وما فات يا شيخ يا هونه



نقره لعرض الصورة في صفحة مستقلة

خمسين عام

سافَرَت
خمسين عام من الزمان
هي عمر؟
والاّ على هامش زمان؟
هي حقيقة علم؟
والاّ هي سراب؟
هي مواجيع الدهر؟
والاّ حنان؟
في عجاج أيامها
دربي يذوب
تاهت الخطوه
وضيعت المكان
أنشغل
عن عمري بعمر آخرين
وانتبه
في لحظة غياب الأوان
مَرّت الدنيا
وأنا ارسم لوحتي
أرسم الفكره
على صهوة حصان
مرت الدنيا
وأنا شعري طفل
ما عصرت الروح
في حرف البيان
مرت الدنيا
وأنا حلمي سحاب
فوق سرج الريح
مطلوق العنان
مرت الدنيا
ولا ادري وش قضيت
من حوايج خاطري
ذكر وعيان
العمر ينقص
وحاجاتي تزود
عقب ما هي أربع(ن)
صارت ثمان
سَافَرت
كن الصحاري ما ازهرت
والمطر ما كنّه أنبت قحويان
سَافَرت
كن الليالي ما أقمرت
ما تقل
سامرت نجمات حسان
ماتقل
غنّت حمامه بالهديل
والهوا
ماهز عود الخيزران
سَافَرت
كن الحوادث ما جرت
وأصبحت سوالفي
كانت وكان
يا زماني
حاجتي في ركعتين
غير ربّ الوقت
مالي فيه شان





نقره لعرض الصورة في صفحة مستقلة



أعظم الحب


أعظم الحب في اتفاق السجايا وأبرّ الوفاء ما هو مطلب
كلما لاح فيصل في خيالي وانتخيت يا لك من أب
لاح سلطان في صميم حياتي وأراني أبي وجاء بأعجب





نقره لعرض الصورة في صفحة مستقلة

يوم أنا طالب


يوم انا طالب هقيت اني عرفت كل مافي الكون من سر الحياه
يوم انا طالب تحمّست ووعدت اني اصلح ما تبيّن لي خطاه
يوم انا طالب على الغيمه رسَمت ضحكة الدنيا على عذب الشفاه
يوم أنا طالب تخيّلت وحَلمت اني البــس من هَدب شمسي عباه
يوم انا طالب حَسبت اني وصلت اثرني ما دست بالرجل الوطاه
وانتهى ربيع الاحلام وظهرت اصدم الواقع ويصدمنى عطاه
ينجرح شوف العيون الى التفت كن في حجر العيون اكبر قذاه
ان بغيت امشي لقيت انّي وقفت وان رفعت الصوت ما جاني صداه
الحقايق فاجأتني ما بدأت والزمان اسرع من اللي في رجاه
وانكسر غصن الخيال اللي زرعت والتوى صدري على تسعين اه
لكن اني رغم هذا ما انهزمت واستمريت ادعس الشوك بحفاه
كلما زادت مواجيعي صبرت بين ثلج وبين جمرات الغضاه
ما غلبت الوقت لكن ما انغلبت اعتصر نبعي من بطون الصفاه
كلها لعيون معشوق(ن) عشقت ديرتي ديرة رفيعين الجباه
في ثراها غالي احبابي دفنت وفي سماها اجمع الحلم وهواه

نقره لعرض الصورة في صفحة مستقلة


الستين


مرت الستين والشايب طفل توي أدرس في كتاتيب الحياه
مرت الستين مازال الجهل كل ما جيت استره يكشف غطاه
مرت الستين فكري ما اشتعل كلمااشعل جذوته وقتي طفاه
مرت الستين دربي ما كمل واقف في راسه أتأمل مداه
ألتفت والوقت يدفعني عجل ماانتهيت من امس وباكر ذا سناه
كل يوم أقول في باكر أمل وان حضر باكر رجيت اللي وراه
أرفع الهقوات لو حظي نزل واقنص القاع الذي ما احد وطاه
المراجل ما بطلبتها خجل يخجل اللي يقدر الطيب وعصاه
السنين اشعار والشاعر مثل يفهمه من شاف بالعقل وقراه
أكتب الايام في شعري غزل كل بيت عاش في عمري حياه


نقره لعرض الصورة في صفحة مستقلة


توك تجي



توك تجي وش عندنا لك ترتجي
لانا أنا ولا الزمان هو الزمان
ولا المكان هو المكان
ولا القلوب ذيك القلوب
اللي توقد لك شبوب
تقدرتعود ترجع تولّع أو تذوب
توك تجي

فوق الغيوم غابت نجوم
تركت على عمري رسوم
تحكي لطلاب الهوى
قــصــة نوى
قصة كتبناها سوا
انت بجفا وأنا بعذاب
توك تجي

توك تجي .. لا لا تجي
خلك كذا
خلك شذا من غير زهور
موجه على ظلمة بحور
خلك على مر الزمن لحن وشجن
عشته معاك ساعة هواك
أحسن تروح عني بعيد
أخاف تجيني واجرحك
لا...لا تجي

نقره لعرض الصورة في صفحة مستقلة



الجرحين


أنا فيني من الأيام جرحين(ن) على الخفاق من الاقصين جرح وجرح(ن) من ربعي الادنيني

أقوم بجرح لكن ثاني الجرحين ساق وعاق مشى سمه مع عرقي ويبست منه كفّـيني

يولّعني وَهج ناره وفي فكري كما البرّاق عواصيف(ن) تودّعني وعاصوف يلاقيني

مثل ريشه نقلها ريح مع شوك وفي مضياق يمزع شوكها جنبي وبالرجلين يدميني

ألَمها جضّ به قلبي ودخّن بالصّدر حرّاق تفجّر كنّه البركان في سمعي وفي عيني

يعاقبني زماني يوم صدري بالعنا ما ضاق أشيل الحمل ما تَعبت من الوعرات رجليني

أعرف أنه قدر عمري واعرف أن الزمن سرّاق وهذا ما كتبه الله وأنا المكتوب يرضيني




نقره لعرض الصورة في صفحة مستقلة



تعبت عيوني


تعبت عيوني بس أدور واراعي و أنشد عن الزينات واشتاق واشوف
لاشك ما قد تاه فكري وضاعِ ألين شفتك و أصبح القلب مشعوف
اللي داعاني لك من الحب داعي داعي غرام للمحبين معروف
ملكتني يا بوعيون وساعِ أسير حبك بين أياديك مكتوف
ليتك تخفف من عظيم التياعي لو تبتسم لي شفتها منك معروف
متى يصير بنور عيني اجتماعي و ألقى التّعب من سيد الأحباب مخلوف



نقره لعرض الصورة في صفحة مستقلة


يوم ميلادي

يمرّني كل عام يوم ميلادي يوم أعرفه ويوم انسى مواعيده
يمرّني وانتبه للغايب البادي واهوجس بحال غيري من مواليده
أرتاع وارتاح له .. يفرق وهو عادي ينقص من العمر عام في ضحى عيده
أناغم الحرف ذا باكي وذا شادي وارسل مع كل دمعه وجد تغريده
ياوابل الغيث كان الحظ به جاد يزهر حياتي نداه وتزدهر بيده
ياركب الايام معك العمر ينقاد كم ليلة(ن) وسّدتني فيك تنهيده
ويارحلة العمر في صحوات ورقاد ويارعشة الجفن في غفوه وتسهيده
في لحظة العمر تسري فزّة فواديلحظه وفزّه وباقي العمر ترديده
الّلحظه الماضيه ما عاد تنعاد والقادم من العمر باالغيب تفنيده
ثلاثة ايّام للرجّال يا هادي يومين دنياه ويوم البعث تخليده



نقره لعرض الصورة في صفحة مستقلة




يتبـ ــ ـــ ــ ــ ــع ــ ــ ـــ ــ ــ >>>






آخر تعديل ام سامي يوم 15-10-2007 في 21:20.
رد مع اقتباس
قديم 15-10-2007, 21:18   رقم المشاركة : 8
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي

نقره لعرض الصورة في صفحة مستقلة

الحزن في صوتك

الحزن في صوتك ازعج ساكني لين صار الكون من حولي حزين

غصب عني حزن صوتك هاجني لين خلّى عاصي المعنى يلين

وامتثل حرف القصيد وعادني وانسكب شعرك على حزني حنين

شلت انا صوتك وحزنك شالني اكتم الصرخه وينساب الأنين

شفت حزنك كيف حزنك شافني كيف داهم خلوتي في لحظتين

طير انا مثلك زماني ضامني جرحتني مثلك سيوف السنين

صابك اللي من زماني صابني في معاليق الحشا جرحه دفين

كلّما ودعت هم زارني من عذاب الوجد بياح الكنين

الفرح عقب الصداقه هابني خافت البسمه على وجهي تبين

طير ياللي صوت حزنك صابني الله اللي ينتصر للصابرين



نقره لعرض الصورة في صفحة مستقلة

ساعة الفرحه

يا ساعة الفرحه تشوقت للعيد

عيد العيون وعيد قلب الصبابه



رد الجمال لشوفتي يا اتلع الجيد

واسحب على حرفي لحون الربابه



حرفي بصوتك يا اجمل الصوت تغريد

يا رمز حبي هاك رمز الكتابه



يا صبح عمر فيك للعمر تجديد

وحبك يجدد كل يوم شبابه



للعين والقمرا وحسنك مواعيد

وليل الهوى شرع للأحباب بابه



ياما زعجت الصوت باسمك تراديد

وياما نسيم الوجد يمك سرابه



وياما تمنيتك على باقي الغيد

واقول مثلك يا غلا الروح ما به



ابيك تهوى مثل ما اهواك وتزيد

يا من خفوق القلب حسنك غدا به



يا قطرة الغيمه على يابس البيد

رد الحياة لخافقي يا ذهابه



نقره لعرض الصورة في صفحة مستقلة


قريت خطـك




قريت خطّك بـ الوفا عشر مرّات =في كل مرّه تنثر العين ماها

ذكرتني هاك الليال الجميلات لو كان قلبي ذاكر(ن) ما نساها

من عقبكم ما عاد للعيش لذّات ما التذّ في دنيا مخالف هواها

اليوم انا مثلك جداي التنهات عيني تهل دموعها من عناها

هايم بعيد الدّار سهران ما بات أتبع هواجيس(ن) بعيد(ن) مداها

نار(ن) تلهّب بين الاضلاع زافات نار(ن) لجت بالخوف العالي سناها



نقره لعرض الصورة في صفحة مستقلة

ظلمتني

ظلمتني والله قوي يجازيك باللي بلاني خالق الناس يبلاك

شابهت عدواني وانا طامع(ن)فيك اقرب قريب(ن) لي هقيت انه اياك

اللي جرالي منك ماهوب خافيك روحي على حد الخطر من سواياك

والله ماغيرك بقلبي يوازيك اغلى من الدنيا على الخد ماطاك

أشفق على اللايم إلى جاب طاريك ودي يطول الشرح في حال طرياك

الشاهد الله من كثر ماني أغليك في سبّتك لو راحت الروح تفداك





نقره لعرض الصورة في صفحة مستقلة



معاد لي


ماعاد لي بمطارد الصيد حاجه ............... إلاغزالن صادني قبل اصيده


ريمن لبس في عالم الزين تاجه ............... عزاه داري عن دياره بعيده


خشفن طعن قلبي وعنده علاجه ................ ماله سلاحن غير عينه وجيده


إلى اظلمت دنياي ولع سراجه ................. يمشي على دربه فوادن يريده


ياعاذلين القلب هذي سذاجه ................. خلوني آحبه واحبه وازيده


القلب قلبي والمخالج خلاجه .................. وكثر الحكي يااهل الحكي مايفيده





نقره لعرض الصورة في صفحة مستقلة

لا هنــــت


لاهنت يا راس الرجاجيل لاهنت لاهان راس(ن) في ثرى العود مدفون

و الله ما احطــّك بالقبر لكن آمنت باللي جعل دفن المسلمين مسنون

منزلك يا عز الشرف لو تمكنت فوق النجوم اللي تعلـــّت على الكون

سكنت دار المجد يا شيخ و اسكنت شعبك معك في منزل العز ممنون

صنت العهد يا وافي العهد ما خنت علمتهم وشلون الاشراف يوفون

كم ظالم(ن) عاداك و اعفيت و احسنت و اخلفت ظن جموع ناس(ن) يظنون

شلت الامانه حافظ(ن) ما تهاونت شفنابك رجال(ن) على النفس يقوون

ياللي طلبها الملك بالحب زيـّــنت عرشك بتاج قلوب شعب(ن) يحبون

لوّنت تاج الملك ما قد تلوّنت ما غرّتك دنياك ما صرت مفتون

بالزهد و المعروف والصبر كونت منهاج فيصل منهج اللي يعذلون

تلفّتت روس المخاليق وين انت ؟ وين العظيم ؟ و عوّد الشوف مطعون

كم خافق(ن) وقّف عقب ما تكفّنت وكم ناظر(ن) ذوّب سواداه معزون

لو شفت حال الناس عقبك تبيّنت مقدار حب الناس للي يودّون

مما بقلبي قلت : يابوي لاهنت وإلاّ انت فوق القول مهما يقولون

نقره لعرض الصورة في صفحة مستقلة


عيون الهنوفه


اخلفتني نظرة عيون الهنوفه

خلفة الصقار لا شاف الحباري


واقت النظره على قلبي تشوفه

واشعل بقلبي كما البرّاق ساري


صد عني طاغي النظره مروفه

ظالم(ن) قلبي وهو بالظلم داري


ياحبيبي صدتك عني حسوفه

ارسل سهوم الذوابح لاتداري


ارسل رماح الهوا وارسل سيوفه

يشتهيك القلب في كل الطواري


عيني لحسن الذي غيرك عيوفه

في عيوني غيرك من الحسن عاري


نقره لعرض الصورة في صفحة مستقلة


أعذرنـــي



أعذرني يا سيدي الزّمان .. فيني على الدنيا عتب

الرجل حيّرها المكان .. و العين حيّرها العجب

....

تغيّرت كل الامور .. و احترت في مفهومها

النايمه قامت تثور .. و الصّاحيه جا نومها

....

النجم ماهو نجمنا .. و الليل ماهو ليلنا

و الصّوت ماهو صوتنا .. و العشق ماهو عشقنا

....

تمطر ولا يظهر نبات .. و نبات ما جا له مزون

وعيون ما فيها حياة .. و حياة مافيها عيون

....

اسافر بفكري و أتوه .. و اناظر بعيني قريب

في عالمي زحمة وجوه .. وانا مع الزحمه غريب


....

صقــّار ماعندي صقر .. خيّال ماعندي فرس

بيني و فرحات الدّهر .. من لعبة ايّامي حرس

....

قصيدتي لعبة عمر .. و خيالتي صهوة سحاب

غنّيت في شمس و قمر .. حضرت في لحظة غياب

....

طالت مسافات الزمان .. وشلون ابقطعها مشي

فراغ مليان المكان .. و خيالنا اصبح غشي

نقره لعرض الصورة في صفحة مستقلة



أحب اللـيـل


أحب الليل و نجوم الليالي
حبيباتي أساهرهن لحالي

لقيت بصحبة النجمات سلوى
عقب ما فارق الخفّاق غالي

ألا يا ساريات الليل سيري
على واديه مع مسرى خيالي

تجلّي في سما خلّ المودّه
و قولي للحبيب وش جرالي

هنيك يا نجوم تناظرينه
و انا مالي على النظره مجال ِ

و لكني ولو شابت عيوني
أحب الليل و نجوم الليالي

صبرت و كل حي لو تصبّر
إلى مالت ليالي العمر مالِ




نقره لعرض الصورة في صفحة مستقلة



كيف ننسى الكويت


كيف ننسي الكويت ومن غزاها والحمية لنا والمقدريه
باكر الحرب لي دارت رحاها ذاكرتنا تعرف انها قويه
تحرق النار رجل اللي وطاها والرديه عواقبها رديه
ما تهون الديار لمن بغاها دونها الموت ورجال عصيه
كل نفس تبي تلحق جزاها وكل نيه لراعيها مطيه
كل عذرا بكينا من بكاها هتكة العرض ما عقبه خزيه
والعجوز الذي جندك رماها وش سبب ذبحة النفس البريه
وكل طفل لكم نفسه عطاها وش جني الطفل من ذنب وخطيه
كل شايب وقف يسند فتاها حالفيين نرد الجابريه
كيف ننسي الكويت ومن نساها باكر تشوف من ينسي خويه



نقره لعرض الصورة في صفحة مستقلة


راس السنه

اليوم اول السنه وامس آخر العام و الشمس تشرق و الملا لاهي

...في ساحة العمر كل(ن) يقرع طبوله ماشفت للنفس عن درب الخطا ناهي

...كل(ن) على ماتبي نفسه يطربها و الذهن عن عبرة ايام الدهر ساهي

...يا غافل القلب لا يغريك زاهيها أفطن ترى الورد مايبطي و هو زاهي

...ياجامع المال يامن غايته دنيا وش حيلتك في غياب المال و الجاهِ

...دنياك لو زخرفت لك شمسها واضحت ترى البلا في خبايا ليلها راهي

...لابد للدرب مهما طالت نهايه و العمر لو طال به حبل الرجا واهي

ا...لرّابح اللي نسيم الحظ له ذعذع قدّاه ربه على التقوى ولا تاهِ



نقره لعرض الصورة في صفحة مستقلة




يتبـ ــ ـــ ــ ــ ــع ــ ــ ـــ ــ ــ >>>






رد مع اقتباس
قديم 15-10-2007, 21:35   رقم المشاركة : 9
معلومات العضو
صعب المنال
 
الصورة الرمزية صعب المنال
 

 

إحصائية العضو







اخر مواضيعي

 

صعب المنال غير متواجد حالياً


افتراضي

الله يعطيك العافيه اختي مشكوووووره على المجهود







التوقيع

رد مع اقتباس
قديم 15-10-2007, 22:00   رقم المشاركة : 10
معلومات العضو
ام سامي
مراقبه سابقه
 
الصورة الرمزية ام سامي
 

 

الوسام الفضي 
مجموع الاوسمة: 1 (أكثر» ...)

إحصائية العضو






اخر مواضيعي

 

ام سامي غير متواجد حالياً


افتراضي

نقره لعرض الصورة في صفحة مستقلة

قصيدة عمري

يا قصيدة عمري اللي تكتبينـــي
كل يوم حرف من نغمة هــــواك
ارحميني يالهوى والا اذبحينــي
لا تخليني معلق في سمــــــــــاك
كل ما اخذتي عمر مني عطيني
لحظة من ساعة داخل حمــــــاك
الحياة آشوفها والموت فينــــــي
واعذاب اللي بغاك ولا لقـــــــاك
اسهر الليل وقمر طيفك بعيــني
والشعاع الصبح يوقظ بي رجاك
أن حدى حادي تولاني حنينــي
وإن عرض طيفك على طرفي بكاك
كيف هذا من هوى قلبي يجيني
يا أرق الناس قولي وش دهـــــاك
لو تماديت بملامي سامحينــــي
قد تماديتي بذبحي من طغــــــاك




نقره لعرض الصورة في صفحة مستقلة


من كثر حبـّي




من كثر حبــــــــي لك تركتك وصديـــــــت
والقلب خالفني عليك وتركنـــــــــي
من شان عينك هنت عيني وضحيـــــــــت
وش عاد لو سهر الليالي هلكنــــي
ابيك وابعد عنك حبـــي وانا ميـــــــــــت
والوم حظٍ بالبـــــــــلاوي شبكنـــي
واذا دعاني حبي الذات عييــــــــــــــــت
احبك اكثر ياعذابٍ ملكنـــــــــــــي
لاجللك جميع ظروف وقتي تحديـــــــــت
حتى الفراق الّي بضرسه علكنـــي
لا ماتخلّى الحب ولا تخلّيـــــــــــــــــــت
كل مابغيت اعود يمّك مسكنــــــي



نقره لعرض الصورة في صفحة مستقلة

احلى عذاب

احلى عذاب اللي رضّى لي حبيبي يجوز لي لا صار لعيون الاحباب

تستاهل عيونٍ سهمها عطيب لا سلهمت بالرمش و الرمش جذّاب

من شافها يشوف شيٍ غريب فيها حنان و ظلم و دموع و حراب

وفيها كلام و سر و امرٍ عجيب لا جيت اعاتبها تراجعت بعتاب

لا شفتها دنياي عني تغيب يلفني موج الهوى بين الاهداب

إن كان ذبحي من عيونك نصيبي اموت لعيونك ولا أحسب حساب





نقره لعرض الصورة في صفحة مستقلة



"أبريت التوحيد"


عبد العزيز...يا منية الأبطال في اليوم العظيم
عبد العزيز...يا دعوة المظلوم في الليل البهيم(1)

يا باعث الأمل البعيد...يا طلعة الفجر الجديد
يا مسترد الملك ..والمجد التّليد(2)
من يوم التوحيد الأول ...أعلنها دعوة صلاه
من يوم التكوين الأمثل...أعلنها مبدأ حياه
لا إله إلا الله محمد رسول الله

رايتنا...دعوتنا.....غاية منهج أمّتنا
لبّيناها ردّدناها.....ونشرنا في الدّنيا صداها
ورغم الحــاسـد....ورغم الحـــاقد
بالتّوحيد اتحّدينا متحدينا ... جاوزنا الصعاب
بالتّوحيد اتعدّينا متعدّينا ... طاولنا السحاب

وبالتوحيد وحّدنا الإله
وحّدنا الوطن

** ** ** ** ** **
نجد أنا والفخر والمجد أنا
ما أبي (3) غير من رأسه عزيز
دوني الموت والسّيف وقنا(4)
ما أبي إلا أنت يا عبد العزيز
ولاح في نجد برّاق البشير
يوم قيل إن أبو تركي مشى
إن شهَر(5) كل صقر ما يطير
وإن مشى كل ذيب له عشا
يا رياض العرب غنّي طرب
ويا قصيم السّعد جاك الوعَد
واقبلت حايل ترد النشيد
في هوَى الّلي علَى الكايد(6) عنيد
يا راعي البيرق(7) تقدم لاتعوق المسير
لا تاقف* إلا عقب توحيد الوطن والسّلام
حنّا هل العوجا لنا بالحرب يوم ٍ كبير
عاداتنا لَى ثوّر الدخَّان مثل الظّلام

وبالتوحيد وحّدنا الإله
وحّدنا الوطن
** ** ** ** **
أنا الحسا أنا النخيل...أنا العيون الجاريه
ما للهوَى يمّك(9) بديل....يا ابن الأسود الضّاريه
وأنا موجة خليج ..عبر بها شيخ القبايل والفريج(10)
من الساحل الشّرقي إلىَ السّاحل الغربي...لها عطر وأريج
وأنا الكنز الدفين علَى موعد مع التوحيد والتاريخ والملك الأمين

يا مرحبا ترحيبة العيد الجديد
بالّلي رقَى سور المعالي وانتصر
يا مرحباً يا جامع أطراف البعيد
يا غاسل قلوب الملا عقب الكدر
ملّيت من حكم الغريب
ملّيت بوقات (11) السّروق
ياما نطَرتك(12) يالحبيب
قلبي علَى وصلك يتوق

وبالتوحيد وحّدنا الإله
وحّدنا الوطن

** ** ** ** ** **

أنا الجنوب دربي عسير
وأصبح لأبو تركي يسير
مرحبَّا ألفين(13) يا شيخ الشيوخ
صافحتك الرّوح من قبل اليمين
شامخ والشّيخ من فوق الشّيوخ
كل عاصي لَى وصل عنده يلين
من قلب الرّبع الخالي
من راس السّوده العالي
أخذت ضيم الّلي لفا
راعي الطّويله والوفا
ومن نجران ومن جيزان
وقلب الباحه لك ولهان
ورد وكادي وريحان
وفل وتهامه بك فرحان
الجبل والسهل والساحل يغني
والشجر والمطر والطير طربان
كل قلب ينام الليل متهني
نحمد الله على توحيد الأوطان


وبالتوحيد وحّدنا الإله
وحّدنا الوطن

** ** ** ** ** **

أنا الحجاز ....سيدي ولا دونك حجاز
عبد العزيز...يا من بحب القلب فاز
وأنا مكّه ...أنا مهد الهدى
وأنا طيبه ...مدينة من هدى
وأنا الطّايف أنا ورد الهدا
وأنا جدّه على خدّي ندى
قابلناك بكل الحب
عاهدناك بكف وقلب
وحيّينا روح التّوحيد
وأيّدنا عهد التّجديد
يا إمام العدل
حقّقت العدالة والأمان
يا كريم الأصل
أصّلت الكرامه والكيان
أول أمه عربيّه
في العصر الحديث
تعلن دولة إسلاميّه
قرآن وحديث


وبالتوحيد وحّدنا الإله
وحّدنا الوطن

** ** ** ** ** **
أنا الشمال....صعب المنال
لله(14) أسلم للطّليب...لا من بعيد ولا قريب
إلا لاخو نوره رضيت...واللّه فلا غيره بغيت(15)
لا يا بعد حي العرب...إنت الهوى وانت الطلب
لك يا العزيز الغالي...يا طربتي يا فالي

تحيّة للغايب إلى منه حضر
احلى من الروض الخضر
أحلى من الطعس الحمر

ياربيع الوسم يا ريح الفياض(16)
يا رفيق الإسم ياراعي الرّياض
فيك اجتمع شمل الجزيرة كلها
فيك انعقد راي المسيره دلّلها
تبوكها مع جوفها لك تستخيل(17)
وشعيب عرعر بالمودّه لك يسيل


وبالتوحيد وحّدنا الإله
وحّدنا الوطن

** ** ** ** ** **

وغاب الأسد ...وخلّف أسود تزود
لطّامة العايل* أصايل عريبين الجدود
أنا اليوم ...واليوم أنا
عهد الفهد أحلى العهود...جيل الفهد جيل الفهود
يافهد يا شيخنا....في يمينك سيفنا
أضرب القاسي يلين...يتبعك شعب أمين
شرعنا في ذا الحياه...مانخاف إلا الإله
حكّامنا منّا....يا سائلٍ عنّا
المليك المفتدى...والعضيد المقتدى
عزا الصّديق الّلي تحاشاه العدا
عبدالله سهم الفرسان...والسيف القاطع سلطان
نبني ونعلّي البنيان...ونفاخر كل الأزمان
نبني المعهد ..نبني المصنع..نبني الإنسان
واحتفظنا بالقيم....واشتهرنا بالشّيم
واكتسبنا من علوم العصر....نوعيّه وكم
ما تبهرنا لمعة برق...ولا قلّدنا غرب وشرق
المبدأ ثابت إسلامي...والمنهج واضح قدّامي
واصبحنا مصدر إشعاع...بالموروث وبالإبداع
يا ملاذ الخايف يا بلادي...يا فخار أجدادي وأحفادي
خير ونعمه...ورفعة سمعه
وعلى الله توكّلنا ...ولله توجّهنا
والمانع اللّه ...والمعطي اللّه





نقره لعرض الصورة في صفحة مستقلة

عــــــــابــــــــر الخـــــــــاطـــــــــر


ياعابر الخاطر تصوّرت معناك
لا شك ماكل الخواطر تقالِ
خذ صورتك لَى جيت ساري بمسراك
مالك بها مصلوح تبقى ولا لي
تلقى من الشعّار الاقصين ذولاك
من ياخذ المعنى على كل حال
وأنا اتخيّر من معقّل مطاياك
مركوبة الفكره وافكّ العقال
إمّا سريت الليل مع نجم الافلاك
والاّ مع شمسي تبعني ظلالي
أوزن كلامي قبل يكتب بالابواك
واقلّب المعنى على ماطرى لي
الورد طيبي واتسوّك من الرّاك
والثوب ضافي والقصر راس عالي

نقره لعرض الصورة في صفحة مستقلة


صاحب الحاجه


صاحب الحاجه ولو طالت لحوح
وصاحب الحلم القديم يغازله
واعذاب القلب من كثر الجروح
كم سيف بالعذاب ينازله
أخفي الطّعنات وعيوني تبوح
كن الاوجاع بهدبها نازله
غايتي بليل ظلامه مايروح
بيني الايّام وبينه عازله
كل ما مشيت له عنّي يروح
وعيّت الخطوه تجي منازله
والهوى بالقلب وهّاج يضوح
لو يسوقه للمنايا جازله
كل ياس يطرده فيني طموح
وكل عزمٍ خافقي ينحازله


نقره لعرض الصورة في صفحة مستقلة


"ظــلـمتين"



الله ياهم نقلته لحالي
مافي يدي حيله ولا بالقدم حيل
أجحد واجنّب مشكلي كل غالي
واكناه(1) عن عدواني الّلي مغاليل
في ظلمتين همومها والليالي
أكشف ظلام الهمّ يا كاشف الليل

نقره لعرض الصورة في صفحة مستقلة



"لمعة النجمه"


في سما ليل الحيارى والسهر
لاح نور من هوى نفسي قريب
لمعة النجمه حدر خد القمر
مثل زهر الفلّ في شعر الحبيب




نقره لعرض الصورة في صفحة مستقلة



نستعجل الأيام


نستعجل الأيام وأعمارنا ايّام
والشّيب يطغى والأماني فتيّه
نهاري أقفى واجمل الحلم قدّام
والحال يضعف والهقاوي غنيّه



نقره لعرض الصورة في صفحة مستقلة


ياللي تعرفون الهوى

ياللي تعرفون الهوى لا تلومون
يلومني من لا درى ويش حالي
الحب يودع عاقل الناس مجنون
يودع كبير السن مثل العيال
واهل الكرم والجود لاجله يذلون
يشحذ عزيز النفس فيه الوصال
ان ساعد العشاق حظِ يسجّون
اسعد ليالي العمر هاك الليالي
وان عاكست سود الليالي يموتون
الحب غربال من اول وتالي



نقره لعرض الصورة في صفحة مستقلة




يتبـ ــ ـــ ــ ــ ــع ــ ــ ـــ ــ ــ >>>






رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

جميع ما يطرح في المنتدى من مواضيع وردود لا يعبر عن رأي إدارة المنتدى وإنما يعبر عن رأي كاتبه


الساعة الآن 03:23.


Powered by vBulletin® Version 3.8.4
Copyright ©2000 - 2014, Jelsoft Enterprises Ltd. TranZ By World 4Arab
Ads Management Version 3.0.1 by Saeed Al-Atwi
Protected by CBACK.de CrackerTracker
  تصميم المركز السعودي لخدمات الويب